Materi Pariwara

 PARIWARA

A. TEGESE PARIWARA

Pariwara yaiku informasi utawa kabar kang asipat nawakake barang utawa jasa marang masarakat. Informasi ing sajroning pariwara duwe ancas ngglembug supaya masarakat kasengsem marang apa sing ditawakake. Pariwara iku kudu narik kawigaten,prasaja, cekak, lan menehi katrangan. Miturut isine, pariwara bisa kaperang dadi papat.

 1. Pariwara Pengumuman

Pariwara iki asipat ngenani sawijining bab, kayata pariwara lomba utawa pariwara acara.

2. Pariwara Panjaluk

Pariwara panjaluk iku digawe dening sawijining lembaga, instasi,utawa pribadi sing isine ngenani informasi kang asipat njaluk, kayata pariwara lowongan kerja lan pariwara sumbangan.

3. Pariwara Dagang (Prodhuk)

Pariwara dagang utawa niaga uga kasebut pariwara prodhuk utawa penawaran, yaiku pariwara kang asipat nawakake barang utawa jasa marang konsumen, kayata pariwara sepatu, klambi, lan sapiturute.

4. Pariwara Layanan Masarakat

Pariwara layanan masarakat yaiku pariwara kang asipat menehi kawruh marang masarakat supaya luwih eling/sadhar babagan apa wae kang rame ing jagading sosial. Contone pariwara bahayane rokok,pariwara posyandu, lan sapiturute.

Miturut ancase pariwara kaperang dadi loro, yaiku pariwara komersial lan pariwara nonkomersial. Pariwara komersial duwe ancas nawakake prodhuk supaya oleh bathi sing luwih gedhe.Mulane, pariwara komersial duwe pasar sing luwih cetha. Dene pariwara nonkomersial iku ancase menehi informasi. Tegese, pariwara kasebut luwih asipat ngajak masarakat kanggo nglakoni sawijining prakara kang becik. Menawa miturut saranane/medhiane, pariwara bisa dibedakake dadi pariwara cithak lan pariwara elektronik.Pariwara diwartakake lumantar medhia cithak, kayata pariwara sing diwartakake ing ariwarti, kalawarti, brosur, lan medhia cithak liyane.Dene pariwara elektronik diwartakake lumantar radhio,televisi,medhia sosial, lan sapiturute.

B. Ciri-ciri Pariwara

Pariwara iku duwe ciri khas utawa titikan, yaiku asipat informatif kang njlentrehake prodhuk kanthi ringkes. Dene ciri-ciri pariwara sing jangkep,yaiku:

1. basane ringkes lan gampang dingerteni;

2. informasine cetha lan ora ngelek-elek prodhuk utawa wong liya;

3. nganggo tembung kang asipat sugestif lan persuasif;

4. nganggo ukara slogan;

5. nganggo gegambaran utawa ilustrasi/visual kang ndhudhut ati utawa narik kawigaten; sarta

6. objektif lan jujur.

C. Struktur teks pariwara lan slogan.

Struktur Teks Pariwara

Kayata sing wis diandharake sadurunge, pariwara duwe telung struktur, yaiku irah-irahan utawa orientasi, awak pariwara utawa tubuh iklan, lan katrangan utawa justifikasi.Katelu perangan mau duwe guna dhewe-dhewe saengga informasi utawa bab sing ana saben perangan uga beda-beda. Struktur teks pariwara kayata ing ngisor iki.

1. Irah-irahan (Orientasi)

Perangan orientasi iki, isine yaiku irah-irahan/judhule pariwara. Perangan sing ana ing ndhuwur dhewe ditulis nganggo basa sing ndudut ati, uga nganggo aksara sing narik kawigaten.Nanging ana uga ing saperangan pariwara sing ora nganggo judhul, nanging jenenge prodhuk.

2. Awaking Pariwara (Tubuh Iklan)

Perangan iki isine jenenge prodhuk sing ditawakake minangka wose pariwara. Perangan iki jlentrehake isining pariwara kang kudu dimangerteni wong liya, kayata unggule prodhuk,kahanan utawa syarat kang kudu digatekake, lan sapiturute.

3. Katrangan (Justifikasi)

Perangan iki isine katrangan ngenani carane oleh prodhuk kang ditawakake, kayata alamat, nomer telpon, lan sapiturute.

t

Slogan

Pariwara digawe kanggo narik kawigaten wong liya saengga teks sing ana sajroning pariwara kudu asipat ngajak utawa persuasif. Salah sawijining teks persuasif sajroning pariwara yaiku slogan. Anane slogan ora mung bisa ndudut kawigaten wong liya,nanging uga njalari pariwara tansah dieling-eling. Kajaba kuwi, slogan uga ngandhut andharaning prodhuk saengga sing maca bisa weruh kanthi terang gayutane karo prodhuk sing ditawakake. Titikane teks slogan,yaiku:

1.tetembungane ringkes lan ndudut ati;

2. gampang dieling-eling;sarta

3. ukarane cekak.

D. Dhasar-dhasar isining pariwara.

Saben pariwara iku duwe kagunan dhewe-dhewe. Pariwara uga digawe kanthi ancas sing beda-beda.Adhedhasar tegese, ancase pariwara yaiku ngglembug, supaya wong padha tuku prodhuk sing ditawakake. Ancase pariwara uga ana sing kanggo ngenalake prodhuk, engangement medhia sosial (interaksi media sosial), mundhakake conversion rate (persentase pengunjung), lan liya-liyane. Amarga iku, isining pariwara kalebu babagan sing wigati supaya ancas sing wis ditemtokake bisa kasil.

Pariwara nggiring konsumen sithik mbaka sithik, ora mesthi langsung bathi. Diwiwiti saka ngenalake prodhuk kanggo nuwuhake kapercayan, banjur nuduhuhake mupangate prodhuk kanthi ngrimuk/ngrayu nganti kedadene dol-tinuku. Urut-urutaning konsumen kanggo nampa pariwara, yaiku kenal, ngerti, seneng, dadi pilihan, mantep, lan pungkasane bakal padha tuku.

Isine pariwara iku kudu objektif, jujur, sarta ora nyinggung prodhuk lan wong liya.Saliyane iku, supaya gampang dingerteni, isine pariwara sing becik kudu ngandhut bab-bab ing ngisor iki.

1. Isine Cetha, Ora Dwimakna (Ambigu)

Pariwara sing becik duwe pesen kang cetha saengga ora ndadekake pamaca bingung.Pariwara sing nganggo tetembungan ora umum, bisa ndadekake pamaca negesi artine kanthi beda-beda. Bisa uga njalari ancase pariwara sing wis ditemtokake ora kawujud.

2. Ora Ngayawara

Pariwara kang becik iku sing informasine padhet. Menawa pariwara iku ngayawara,isine ora bisa tekan marang pamaca amarga marai bingung.

3. Nganggo Basa sing Lumrah

Pariwara sing becik nganggo basa sing lumrah lan gampang dingerteni. Ora kudu nganggo basa sing baku, pawarta bisa nganggo basa padinan nanging tetembungane kudu sing sopan.

4. Informatif

Pariwara sing becik uga bisa menehi informasi sing mupangati marang pamaca, ora namung ngajak kanggo nuku prodhuk sing ditawakake.

5. Nyenengake (Menghibur)

Salah sawijine ciri pariwara, yaiku bisa ndhudhut atine pamaca. Tuladhane menawa sing dituju wong-wong enom, mesthi bakal seneng yen isine pariwara ngandhut dhagelan (humor).

6. Ringkes

Pariwara sing becik iku cekak lan cetha. Menawa isine pariwara kedawan, bisa marakake pamaca dadi bosen.

E. GAWE PARIWARA

Nggawe pariwara sing bisa ndudut ati katone angel, nanging sejatine ora angel.Pariwara sing becik, yaiku sing ringkes, narik kawigaten, sarta ora nyinggung prodhuk lan wong liya. Pariwara iku nawakake piranthi layanan, utawa idhe marang wong liya,dadi anggone nggawe ora entuk ngawur, kudu digatekake unggule, basane, gambare, lan inovasine supaya bisa ndhudhut atine pamaca. Carane nggawe iklan kaya mangkene.

1. Temtokake Ancase/Tujuane

Sadurunge nggawe iklan, temtokake dhisik ancase sing bakal dituju saengga isine pariwara bisa trep.

2. Temtokake Sarana sing Arep Dianggo

Medhia minangka sarana martakake pariwara kudu ditemtokake, arep ing medhia cithak utawa medhia sosial, kayata Instagram, TikTok, Facebook,lan liya-liyane.

3.Gatekna Detail Desain

Nggawe iklan kudu nggatekake detail desain, awit iku awujud poster utawa video.Desain iku bab sing wigati amarga dadi bageyan sing pisanan dideleng dening konsumen,kayata jinising fon, werna, gambar, layout, lan liya-liyane. Desain uga wigati kanggo nuduhake ciri/karakteristik prodhuk sing digawe.

4. Wenehi Penawaran sing Ndudut Ati

Konsumen bakal kadudut atine menawa iklan sing digawe menehi penawaran, kayata diskon,tuku loro oleh tambahan siji, ora ana beyaya kirim,lan liya-liyane.

5. Nganggo Tembung Persuasif

Kanggo narik konsumen, nganggoa basa kang asipat pangajak lan pambujuk supaya konsumen gelem tuku prodhuk sing koktawakake.

6. Wenehi Irah-irahan lan Slogan

Gawea irah-irahan lan slogan. Cakcakane kanthi gawe tulisan sing luwih gedhe tinimbang liyane supaya konsumen bisa langsung tumuju marang irah-irahan utawa slogan mau. Ora prelu nganggo jinis fon sing akeh, cukup loro utawa telu. Saben perusahaan adate duwe slogan utawa tagline dhewe-dhewe sing nuduhake prodhuke.

7. Wenehi Testimoni

Testimoni yaiku pengalamane konsumen ngenani prodhuk sing wis dituku, bisa babagan kwalitet, leladen (pelayanan), lan liya-liyane. Testimoni bisa ndadekake konsumen luwih mantep marang prodhuk sing ditawakake.

8. Wenehi Tagar/Hashtag

Tandha pager utawa hashtag iku minangka salah sawijine cara kanggo nggampangake konsumen anggone nggoleki prodhuk sing ditawakake, mligine sing ditawakake ing internet.

9. Ngajak Tokoh sing Kondhang

Salah sawijine cara kanggo narik kawigatene konsumen yaiku ngajak tokoh sing wis kondhang ing masarakat. Cara iki dudu sing utama, nanging menawa prodhuk sing koktawakake wis gedhe, bisa coba nganggo cara iki supaya pasarane luwih gedhe. Jaman saiki,sapa wae bisa oleh endorsment menawa duwe follower sing akeh ing medhia sosial.

10. Nggawe Video kanthi Kreatif

Ngrembakaning jaman, saiki pariwara ana uga sing digawe awujud video unboxing lan review utawa ndhudhah lan menehi tanggapan marang prodhuk. Isi vidione babagan informasi ngenani prodhuk sing didhudhah, bisa kwalitet utawa kahanane,kaluwihane,lan kakurangane. Ancase supaya konsumen mangerteni kwalitet prodhuk sing didhudhah saengga sadurunge padha tuku, sangsaya mantep marang prodhuk kasebut.

PUSTAKAWAN

Riyanto, Pujo, dkk.2023. Lantip Basa lan Sastra Jawa. Jakarta : Erlangga